പെൺഭ്രൂണങ്ങൾ

അതിജീവനത്തിൻ്റെ      വഴികളിലൂടെയാണവരുടെ സഞ്ചാര മാർഗ്ഗ പ്രദക്ഷിണം

 കാലങ്ങൾ സാക്ഷി കുലദൈവങ്ങൾ സാക്ഷി സാക്ഷരമാകുന്ന നാടുമേ സാക്ഷി

  പെണ്ണായ് പിറക്കുന്നതേ പാപമെന്നതോ തിണ്ണം വിചാരിച്ചിരിപ്പു സമൂഹവും

  നിർമ്മിതബുദ്ധി കടന്നെത്തി പെൺഭ്രൂണങ്ങൾ പോലുമേ സമരം ചെയ്തെത്തിടും

  പെണ്ണുപിറന്നാലോ പൊല്ലാപ്പതേറെയാം  പിറവിയ്ക്കു തടയിടുന്നതേ ബുദ്ധിയാമെന്നു 

  വിചാരിച്ചിരിപ്പവരോർക്കില്ല തങ്ങളീ ഭൂമുഖത്തുണ്ടായ ഹേതുകം

  പെണ്ണു വെറും പെണ്ണുമാത്രമെന്നോർക്കുവോർ

ഓർക്കില്ല പെണ്ണിൻ കരുത്തും സഹനവും 

  എത്ര സാമ്രാജ്യമൊടുങ്ങി മറ്റെത്രയോ കെട്ടിപ്പടുത്തതും പെണ്ണിൻ്റെ ബുദ്ധിയാൽ 

  പെണ്ണു പിഴയ്ക്കുന്നു കോവിലകങ്ങളിൽ പെണ്ണു പിഴയ്ക്കുന്നു പാഴ്മൺകുടിലിലും

  ചിന്തകൾക്കിന്ധനം തേടുമിടങ്ങളിൽ ചിന്ത വെടിഞ്ഞുള്ള സല്ലാപശാലയിൽ

  എല്ലായിടത്തും ഇരയായി മാറുന്നതെന്നുമവൾ തന്നെ നിഴൽ വീണ രൂപമായ്

  ലിംഗസമത്വം പറയുന്ന കൂട്ടർക്കും ഖിന്നതയില്ല പെൺഭ്രൂണമൊടുക്കുവാൻ

  പപ്പടം ചുട്ടെടുക്കുന്ന പോൽ ലാഘവപ്പെട്ടുപോയ് നീതി നിയമമൊരുക്കുവാൻ

  മാറണം അന്ത:കരണമതല്ലായ്കിൽ അന്തസ്സിടിക്കുവാൻ മാത്രമാം നീതിയും

  നീതി പ്രബോധനം മാംസദാഹത്തിന് ആചമധർമ്മം കൊടുക്കില്ല നിശ്ചയം

  കാലം കടന്നുപോം നമ്മിലെസംസ്കാരചിത്തം പുനർവായനയ്ക്കായൊരുങ്ങട്ടെ