എന്നും നിനക്കായി കാത്തിരിക്കട്ടെ ഞാൻ

വരുമെന്നറിഞ്ഞുള്ള കാത്തിരിപ്പെങ്കിലും

വരുവാനിളയ്ക്കുമ്പോഴറിയാതെയെൻമനം

ഗതകാലചിന്തതന്നിരുളാർന്നവഴികളിൽ

ഉഴറിക്കിതച്ചു തളർന്നു നിൽപ്പായ്

കുതുകം നിറഞ്ഞുള്ള കാത്തിരിപ്പെങ്കിലും

കുതികുതിച്ചെത്തുന്ന ഓർമ്മകളോടി വന്നൊരു ഫുല്ലമലരായ് വിടർന്നെൻ്റെ ചൊടികളിൽ കടുചോപ്പു തേയ്ക്കുന്നു മന്ദം

വരികില്ലയെന്നുള്ളിൽ പറയുന്നുവെങ്കിലും വെറുതെ മനസ്സിൻ്റെയിരുൾ വീണ കോണിനെ പുണരും വിചാരങ്ങളണയും

നിമേഷത്തിനരികിൽ വെറുതെയിരിപ്പൂ

മനസിൻ്റെ വിങ്ങലിൽ തിങ്ങുമാഗദ്ഗദ ച്ചുടുവാതമേറ്റെത്ര സ്വപ്നം കരിഞ്ഞതും കരിയുമാസ്വപ്നത്തിനിരുൾ രൂപമാർന്നു നിൻ തിരുരൂപമൊപ്പമുയർത്തെഴുന്നേറ്റതും

ഒരു വേള വരുമെന്നതോർത്തിരിപ്പാകുമോ

നവമാം പ്രതീക്ഷയിലൊരു നേർത്തചിന്തയിൽ 

അലയുമാത്മാവിൻ്റെ

യഭിലാഷപൂർത്തിക്കുതകും 

തുടിപ്പായ് തുടിച്ചു

എന്നും നിനക്കായി കാത്തിരിക്കട്ടെ ഞാൻ

മിന്നും മിനിങ്ങായ് കിനാവിൻ നുറുങ്ങായ്

കരളിൽ പൊരുളായ് ഇരുളിൻ തിരളായ്

കുതികൊള്ളുമാശാസ്ഫുരണമായ് നിത്യം

എന്നും നിനക്കായി കാത്തിരിക്കട്ടെ ഞാൻ

എന്നാത്മസവിധത്തിലേകാന്ത ശാഖിയിൽ

സൃഷ്ടിപഥം 13.3.26