കാണാമറയത്ത്

കണ്ണിൽ കാണുവതെല്ലാം നമ്മൾക്കുള്ളിൽ ദീപ്തമതായീടും

കാണാമറയത്തുള്ളവയെല്ലാം കല്പനചെയ്യും മനതാരിൽ

കാൺമതുമല്ലാത്തവയും ജീവിതധാരയിലുൾചേർന്നീടുന്നു

കാലംപോകെ കാൺമവരെല്ലാം കാണാമറയത്താകുന്നു

പുതിയവർ പലരും കൺവെട്ടത്ത് 

പുലരി വെളിച്ചം തേടുന്നു

ചാക്രികസഞ്ചാരങ്ങളിൽ ലോകം 

പഴയ ക്രമങ്ങളിലുഴറുന്നു.

കണികാവാദമുയർത്തുന്നവരും ഗണവാദങ്ങളുയർത്തുന്നവരും

സിദ്ധന്മാരും സാദ്ധ്യന്മാരും 

കൂടിച്ചേരുന്നിടമാണിവിടം

നാസ്തികർ ആസ്തികർ രാഷ്ട്രീയത്തിൻ കൗടില്യന്മാർ

ഒക്കെ നിരക്കുന്നിവിടെന്നാലും 

നിശ്ചയമവരും കാണാതാകും.

അന്തരമില്ലവർ വന്നെത്തീടും 

മരണം തീർക്കും കൂപമതിൽ

പുതുനിഴലാട്ടം കാൺമതിലുണ്ടൊ- രയുക്തി നിനച്ചീടുന്നേരം

ജീവിക്കുമ്പോൾ ജീവികൾ നമ്മൾ 

ജീവൻ പോകെയമൂർത്തന്മാർ

ആത്മാവെന്നതു ഘോഷിക്കുന്നു 

ജന്മാന്തരമാം കാലത്തിൽ

അവിടെക്കാണ്മതു ശാശ്വത സത്യം ഉലകിൻ നിത്യ പ്രയോക്തനസത്യം

നശ്വരമാണീ ജീവികളെങ്കിലനശ്വരമാണീ ആത്മാവിൻ പൊരുൾ

1st Prize ദലം 209 KSSV