പ്രണയസഞ്ചാരങ്ങളിലെ നീയും ഞാനും

പ്രണയം പ്രണയമാണെന്നതറിയാതെ

പ്രണയിച്ചു പോയി നാമെപ്പൊഴാമോ?

സംശയം ചോദിച്ചരികിൽ വന്നപ്പൊഴോ

സഞ്ചാരമദ്ധ്യേയടുത്തിരുന്നപ്പൊഴോ

ദീപം തെളിച്ചു നീയമ്പലമുറ്റത്ത് മറ്റൊരു

ദീപം കണക്കെ തൊഴുതു നിന്നപ്പോഴോ

എന്നിലെയെന്നെയറിഞ്ഞു നീ, താരയോ

എന്നുള്ളിൽ മോദമുണർത്തിയ രാഗമോ

പറയാതെ പറയുന്ന മനസിൻ്റെ ഭാഷകൾ

പരിഭാഷ ചെയ്വതോ നിൻ്റെ കൺകൾ

മൃദുചുംബനം നിൻ്റെ കണ്ണുകൾക്കേകവേ

മിഴിനീരൊഴുക്കിയതെന്തിനാവാം

അധരത്തിലധരം കൊരുത്തു നീയെന്നിലെ

അനുരാഗ കാവ്യം കവർന്നെടുത്തു

പ്രണയസഞ്ചാരങ്ങളിൽ നീയും ഞാനുമായ്

ജീവിതപ്പാതകൾ താണ്ടിടുന്നു