അഹിംസ

അഹിംസ

മേൽവസ്ത്രമില്ലാത്ത മേനിയും

ഇടം കയ്യിൽ ഊന്നിപ്പിടിച്ച വടിയും

വട്ടച്ച കണ്ണട വട്ടത്തിനുള്ളിലെ

കത്തിച്ചു വച്ച മിഴിച്ചിരാതും

സത്യത്തിനൊപ്പം ചരിക്കുന്ന പാദങ്ങൾ

 എത്തുന്നു തീണ്ടാത്തുരുത്തുകളിൽ

മിണ്ടാവ്രതത്തിനുമുണ്ട് കരുത്തെന്ന്

മിണ്ടാതെ മിണ്ടുന്ന കർമ്മ മാർഗ്ഗം

പട്ടിണിയുണ്ണുവതല്ലുപവാസമത് 

ഉള്ളിലെയുലയൂതിയോരുന്ന സമരമാം

തീയുണ്ട തുപ്പവേ 'ഹേ റാം' എന്ന നേരിനാൽ

ഹിംസയെ അഹിംസയാൽ നേരിട്ടു ഭാരതം

വാൽക്കഷണം :

ജീവിതം കൊണ്ടു സന്ദേശം 

ആരചിക്കുന്ന ധീരരെ 

വാഴ്ത്തിടും ലോകമെന്നാളും

അതിനില്ലൊരു സംശയം