ഒറ്റയടിപ്പാത

ചവിട്ടടികളേറ്റ് പാത പതം വന്നു

ധാർഷ്ട്യത്തിൽ തലയുയർത്തിയ

പുൽക്കരുത്ത് ഞെരിഞ്ഞമർന്നു

പാദാധിപത്യം സർവ്വാധിപത്യമായി

പാതയോരങ്ങളിൽ നിതാന്തജാഗ്രത

നുഴഞ്ഞുകയറുന്ന പുൽക്കൊടികളെ

നിർദ്ദയം അരിഞ്ഞു മാറ്റുന്ന നൃശംസത

അതിരുകൾ അതിക്രമിക്കപ്പെടരുതല്ലോ!

ഒറ്റയടിപ്പാതകൾ ബഹുജനഹിതത്തിൻ്റെ

നീതിസാരങ്ങൾ ഉൾക്കൊള്ളുന്നവയല്ല

ഓരങ്ങളിലെ പുൽമേടിൽ യന്ത്രക്കൈ

രാജപാതയിൽ പുൽനാമ്പുകളുടെ ഹനനം

ഇന്നിപ്പോൾ ചവിട്ടടികൾ പതിയുന്നില്ല

ചീറിപ്പായുന്നു കവചിത വാഹനങ്ങൾ

രാജാവിൻ്റേയും രായസത്തിൻ്റെയും

പിന്നെ വെടിയുതിർക്കുന്ന അക്ഷൗഹിണി

1. 12.25