പച്ച തിരയുന്ന ഭൂമി

ഗ്രാമഭംഗികളൊന്നൊന്നായ്

 നാടു നീങ്ങുന്നു നീളവേ

ഭൂമി പച്ചപ്പ് തേടുന്നു ഊഷരമാം പ്രകൃതിയിൽ

കേരവൃക്ഷങ്ങൾ തിങ്ങുന്ന നാടു നമ്മുടെ കേരളം

എന്ന് ചൊല്ലിപ്പഠിച്ചിപ്പോൾ , പാഠഭേദം വരുത്തണം

ശുദ്ധ തോയമൊഴുക്കുന്ന ആറു വറ്റിവരണ്ടു പോയ്

കാടുകാവുകുളങ്ങളും തിറയാടി നിന്ന തരുക്കളും

സ്വർണകാന്തി കൊതിക്കുമാ നല്ല മരതക നെൽവയൽ

കർണികാരങ്ങൾ പൂക്കുന്ന നൽ മനോഹര വീഥികൾ

പുല്ലുമേടുകൾ, ഫുല്ലമാം വനമുല്ല തീർത്ത സുഗന്ധവും

ഇന്നു കാണുവതില്ല, നമ്മുടെ നാടിതെത്ര വളർന്നു പോയ്

ഇന്നു കാണ്മതു കുന്നിടിച്ചുള്ള നിർമിതികളനവധി

ഇന്നു കാണ്മതു കാടുവെട്ടി നിരത്തിയേറ്റിയ ജനപദം

എങ്ങുമുന്നത സൗധമാണതിനൊത്ത വന്മതിൽ ചുറ്റിലും

മുറ്റമാകവേ വെൺകുളിർകല്ലാൽ വിസ്തരിച്ചു വിരിച്ചതും

മോഡിയോടെ വസിച്ചിടാം കൃഷി വേണ്ട നമ്മൾക്കിന്നിമേൽ

നാടു നീങ്ങുമോ നാട്ടു നന്മകൾ തീനൊരുക്കുന്ന രീതിയും !