വിരഹ പക്ഷികൾ

ഇരച്ചുപെയ്യും മഴയെത്തിയേറ്റം

കനത്തശീതത്തെ വരുത്തിയല്ലോ!

അശിക്കുവാനായ് ചെറുപക്ഷി പോലും

ലഭിച്ചതില്ലാ പകലേറെയായി

വിറച്ചുകൊണ്ടാ നരവീണ വ്യാധൻ

മറഞ്ഞു നിന്നു തരുഷണ്ഡമാർന്ന്

അണഞ്ഞു നിൽക്കും മാകന്ദമൊന്നിൽ

പറന്നു വന്നെത്തി ഇണപ്പിറാക്കൾ

നനഞ്ഞ തൂവൽ ചിറകൊന്നനക്കി

ഇണയ്ക്കു ചൂടേകിയിരുന്നു വേഗം

തുണയ്ക്കു ചുണ്ടാൽ തൂവൽ ചികഞ്ഞ്

തോഷം വരുത്തി സുഖദാലമർന്നു

പശിച്ചു നിൽക്കുന്ന കിരാതനപ്പോൾ

ആശിച്ച വണ്ണം അശനം തടഞ്ഞു

കൂരമ്പു കൊണ്ട് പെൺകിളി പതിച്ചു

വിരഹം സഹിച്ചില്ലിണക്കിളിക്ക് 

ഇനി വേണ്ട വാനം വിരഹപെരും

ചൂടമരുന്നു നെഞ്ചിൽ ചിതയെന്ന പോലെ

അണയാൻ തുടങ്ങും അടുപ്പിൻ്റെ വേവിൻ പുകച്ചൂരുയർന്നു മിഴിത്താരടഞ്ഞു

ചിറകാർന്ന രാഗം ഉയർന്നാവു വാനിൽ

ചിരിക്കുന്നു വേടൻ മനം തൃപ്തമായി