തുലാമഴ

തുലാമഴ 

കർക്കിടകപ്പെയ്ത്തും തുലാമഴഘോഷവും

ഹർഷമായ് നിന്നു 

മനസ്സിലെന്നും

ഉള്ളുലഞ്ഞുടൽതരിച്ചുള്ളൊരാ-

മോർമ്മകൾ

തുള്ളിക്കളിക്കുന്നു 

ഹൃത്തിലിന്നും 

ചണ്ഡമായ് വീശുന്ന കാറ്റിൻ്റെ ഹൃങ്കൃതി വാരിയെടുത്തെറിയുന്നു പത്രങ്ങളെ

പുസ്തകക്കെട്ടു നനയാതിരിക്കുവാൻ നെഞ്ഞോടുചേർത്തുപിടിച്ചു നടന്നു ഞാൻ

കുഞ്ഞൻകുരങ്ങിനെത്തള്ള -

ക്കുരങ്ങുകൾ

നെഞ്ഞോടുചേർത്തങ്ങണച്ചു 

മണ്ടുന്നപോൽ

ഗർവ്വിച്ചു മേഘങ്ങൾ ഗർജ്ജിച്ച നാദത്തിലുള്ളാൽ 

നടുങ്ങി വശം കെട്ടുപോയതും

മിന്നൽപ്പിണരിൻ്റെ മിന്നും പ്രശോഭയിൽ കണ്ണിണപൊത്തിത്തരിച്ചു 

ഞാൻ നിന്നതും

ഇന്നലത്തെപ്പോൽ തെളിയുന്നു 

മാനസപ്പൊയ്കാജലത്തിൽ നിഴൽരൂപമെന്നപോൽ