നീലപ്പട്ടുടുത്ത പ്രണയതാഴ്വാരം

നീലക്കുറിഞ്ഞികൾ പൂക്കുന്ന ദിക്കിലെ

പ്രണയാർദ്ര നിമിഷങ്ങൾ ഓർമ്മയില്ലേ

ഒരു വേള നമ്മളന്നൊഴുകും മരാളമായ്   

അലകളിൽ അനുരാഗ തിരയിളക്കി

 

നീലപ്പട്ടുടുത്തൊരാ പ്രണയ താഴ്വാരത്തിൽ

അലസാംഗി നിന്നെ പുണർന്നു നിൽക്കെ

അതുവരെയറിയാത്ത അസുലഭ നിർവൃതി

അടിമുടി നമ്മെ പൊതിഞ്ഞു നിന്നു

സഹ്യാദ്രി സാനുക്കൾ പോറ്റി വളർത്തുന്ന

വനജ്യോത്സ്നയാണോയീ കുറിഞ്ഞിപ്പൂക്കൾ

വനദേവതകൾക്ക് ചൂടാനായ് വിരിഞ്ഞതോ

വരവർണ്ണിനി നിന്നെ വരവേൽക്കാനോ

ഒരു വ്യാഴവട്ടത്തിൽ ഒരു കാലം വിരുന്നിന്

വരുമെന്നു ചൊല്ലി നീ മറഞ്ഞില്ലയോ!

ഹൃദയത്തിലതു കാലം തുടികൊട്ടിയുണരുന്നു

അണയാത്ത അനുരാഗ സ്വരമന്ത്രണം