സമർപ്പണം

സമർപ്പണം ചെയ്വു സമസ്തവും നിന്നിൽ

സഹർഷമങ്ങനെ ലയിക്കയാണവൾ

പ്രണയലോലയായ് പകർന്ന രാഗങ്ങൾ

മധുര ജീവിത ധ്വനിയിൽ മുങ്ങുന്നു

തനു തളരുന്നു തരള ഗാനമാ

വിയത്തതിൽ വന്നു വിലയം കൊള്ളുന്നു

ഒരു മുളന്തണ്ടിൽ ഉണരും നാദമായ്

ഇളയിൽ സാരസ പ്രകരണങ്ങളായ്

ഉണർന്നാവൂ പ്രേമ പ്രകീർത്തനങ്ങളും

ഉലകിലുൽഫുല്ല രസോൻമദനവും

അറിഞ്ഞതില്ലതാമഴകിൻ മേളനം

അതു ഭ്രമാത്മക ജ്വലന വേഗമായ്

പടർന്നു മേനിയിൽ പരമാണുക്കളിൽ

നിറഞ്ഞ ചൈതന്യ പ്രഭാകിരണമായ്

നരനും നാരിയും അഭേദരാണെന്ന

പരമസത്യത്തിൻ പൊരുളറിഞ്ഞു നാം

അകക്കണ്ണിൻ ദ്യുതിയൊഴിഞ്ഞ മാനുഷ രറിയുന്നില്ല ഹാ ബഹു കഷ്ടം തന്നെ 

മദം മുഴുത്തതാം നാരാധമരിവർ

അറിഞ്ഞതില്ലല്ലോ മഹദ്പ്രഭാവങ്ങൾ 

നടുക്കമോടെ നാമറിഞ്ഞു ഭീദിതം

അബലമാർ മാനം കെടുന്നോരോവിധം

അവർക്കനുഗ്രഹം ചൊരിഞ്ഞിടാൻ ദിവ്യ കരങ്ങളൊന്നുമേ ഉയർന്നതുമില്ല

സ്വയം സമർപ്പണ പ്രശോഭയിൽ വേവും പതിതരല്ലിന്ന് വനിതകളോർക്ക

അവർ തൻ ജീവിതം മഹത്തരമെന്ന്

അടിവരയിടും ചരിത്രവും നേരും