അലിഞ്ഞില്ലാതാകുന്ന ഓർമ്മകൾ

കാലം മെല്ലെ കടന്നുപോയപ്പോൾ   

അലിഞ്ഞില്ലാതാകുന്ന ഓർമ്മകൾ

നൃപവര്യർക്ക് ചിന്തിച്ചാൽ ചിതമായ്

തോന്നിടുമെങ്കിലും, കാത്തിരിക്കുന്ന 

കന്യയ്ക്ക് കടലിരമ്പുന്നു ചിന്തയിൽ

ക്രുദ്ധാരുണനേത്രത്താൽ ഭത്സിപ്പതു താതനോ

ഭൂതവും ഭാവിയും കാണും ജ്ഞാനതാപസ - വര്യനോ !

മുദ്രാംഗുലീയം മറവിക്ക് മറുമരുന്നെന്ന ചിന്തയിൽ

വിരലിൽ പരതി നോക്കുന്നു, വ്യർത്ഥകർമ്മ ഫലശ്രുതി

തനുവും മനവുമൊന്നായി തന്നെത്തന്നെ മറന്ന നാൾ

കലർന്നു കലർപ്പില്ലാത്ത രാജരക്തം കലകളിൽ

അണിവേർപ്പിൽ മുങ്ങി നിൽക്കുമ്പോൾ

അകതാരിൽ തുടിപ്പുകൾ, 

കടുനോവായ് പെരുകുന്നല്ലോ 

പുഴയിൽ വാരിത്തുടിപ്പു പോൽ

അഭിജ്ഞാനം ചെയ്തതില്ല ഉടജാന്തര കഥാഗതി

അഭിധാനം ചെയ്വതുണ്ടോ ഉദാരന്തര ജീവൽ തുടിപ്പിനെ