എൻ്റെ നാട്
എവിടെ തുടങ്ങണം എങ്ങനെ തുടങ്ങണം
എൻ്റെ ജീവിതത്തിൻ്റെ നാൾവഴിക്കുറിപ്പുകൾ
എൻ്റെ ജീവിതമല്ല; എൻ്റെ നാടിൻ്റെ തന്നെ
മുന്നേതാം സ്ഥിതികാണാം,രജതസ്ഥലികളും
കുന്നുകൾ കുളങ്ങളും കിന്നരി തീർക്കും മട്ടിൽ
പച്ചപ്പു വിതാനിക്കും നെൽവയൽ വരമ്പുകൾ
കല്പതാരുക്കൾ നൽകും അമൃതിൻ കുടങ്ങളിൽ
സ്വപ്നവും ജീവിതവും കടഞ്ഞേ കഴിഞ്ഞല്ലോ!
വെള്ളമൺ പരപ്പിന്നിടയ്ക്കായ് പഞ്ചാരമൺ
കൂനകൾ നിരത്തിയ കുന്നുകൾ നീളെക്കാണാം
വെള്ളിമൺവഴികളിൽ ചായം കൊണ്ടെഴുതിയ
ചിത്രമെന്നതുപോലെ തളിർപുന്നകൾ, പ്രകൃതിതൻ
ഭിന്നഭാവങ്ങൾ മിന്നിമറയും ദ്യോവിൻ മുഖം ചായക്കൂട്ടണിയുന്നുണ്ടഴിക്കുന്നുണ്ടു വേഗം.
പായ്വഞ്ചിയേറിവന്ന വർത്തകപ്പറങ്കികൾ
വിത്തിട്ട വൃക്ഷം ഞങ്ങൾക്കഷ്ടിക്കു വകതന്നു
ദൂരെയേതോ കുന്നിൽ മുട്ടയിട്ടയ്യോ കാണാഞ്ഞെങ്ങുമേ കരഞ്ഞാർത്തു വിളിക്കുന്നൊട്ടേച്ചികൾ
ശാന്തമായ് ഒഴുകുന്ന കായലിന്നോളക്കൈകൾ
തീരത്തെയാശ്ലേഷിക്കാൻവെമ്പലാർന്നടുക്കയോ
വൻപുന്നമരത്തിൻ്റെ കൊമ്പിന്മേൽ വല ഞാത്തും
വൻപരുന്താണോ? ചീനവലയോ ശങ്കിപ്പു നാം
കന്നത്തു കടക്കണ്ണിൻ വെളിച്ചം പ്രകാശിക്കും
ഉന്നതം വിളക്കുകാൽ ആരെയോ കാത്തിരിപ്പാം
അക്കരെ വയലാറ്റെ വിപ്ലവപ്പെരുങ്കളിയാട്ട
ത്തിലൊടുങ്ങിയ ധീരരാം മക്കളെയോ?
കെട്ടുവള്ളത്തിലേറി വർത്തകർവണിക്കുകൾ
പണ്ടേപ്പോൽ വരുമെന്ന മിഥ്യയിൽ മനം നട്ടോ?
