വിളക്ക്

അക്ഷരം വെളിച്ചമാണ -

ണണയാ ദീപം തന്നെ

ഹൃത്താരിലുറപ്പിച്ചു

ജയിക്ക മേൽക്കുമേൽ നീ

അക്ഷരം പരബ്രഹ്മമാ

ണതിരുളിൽ വെളിച്ച -

മാണായത് സ്വരമാണോ -

ങ്കാരപ്രകൃതിയും

അക്ഷരം ധർമമാണെ-

ന്നെന്നും നിലനിൽക്കും

അക്ഷയ ധർമമത്രേ

യാഗതപസ്സിദ്ധി കേൾ നീ

അക്ഷരം അംബുവാണാകാ -

ശമാണധർമത്തെയടി -

യോടെ വെട്ടിവീഴ്ത്തും 

കൊടുവാൾ ഓർമ്മിക്കെടോ.

അക്ഷരം വാക്കാണോർക്ക

വാക്കെന്നതോ പ്രമാണവും

വാക്കിന്റെ സമയരേഖയിൽ

കോർത്താണല്ലോ തീർക്കുന്നു

പ്രഭാഷണം വിദ്വാന്മാരനായാസം

അക്ഷരവിളക്കിന്റെ മുന്നിൽ

നിന്നല്ലോ നാമകീർത്തനം

ചൊല്ലുന്നതതും ചേലിൽ

കാവ്യങ്ങൾ പഠിപ്പതും.

തുഞ്ചനാമാചാര്യനും കുഞ്ചനും

വള്ളത്തോളും  ആശയ ഗംഭീര -

നാമാശാനും ചെല്ലിക്കേൾപ്പൂ

ഉള്ളൂരും ഉജ്ജ്വല വാഗ്ധോര -

ണിയാലേവം പാഠപുസ്തകത്തിൽ നെയ്വിളക്കായ് തെളിഞ്ഞില്ലേ

വിശ്വത്തെ ദീപമയമാക്കുന്നൊ-

രക്ഷരാളി, ഭദ്രന് വിളങ്ങട്ടെ

നന്മയായ് മനതാരിൽ .

ആ വിളക്കിൻ ദിവ്യ ജ്യോതി -

യിലനാരതം ശാന്തിസംഭവി_

ക്കട്ടെ യുദ്ധങ്ങളൊഴിയട്ടെ.

- ശങ്കരനുണ്ണി